ನಿನಗೆ

ತಪ್ಪಿಲ್ಲದೇ ಬರೆವಾಗ,
ಬಿರುಬಿರನೆ ನಡೆವಾಗ,
ಮನಸ್ಫೂರ್ತಿ ನಕ್ಕಾಗಲೂ
ನಿನ್ನದೇ ನೆನಪು...
ದಣಿದ ವೇಳೆಯಲೆಲ್ಲ ಕಾಲ ತೊಟ್ಟಿಲ ಬಯಕೆ!
ಅಲ್ಲೆಲ್ಲೋ ನಮಗಾಗಿ,
ನಿನ್ನಳವಿಗೆ ಏನೂ ಅಲ್ಲದ
ಆ ದಫ್ತರಗಳ ನಡುವೆ
ಬೇಯುತ್ತಿರುವ,
ಸೆಳೆವ ಕಾಲುಗಳ ನಡುವೆ,
ಬಿಸಿಲಲ್ಲಿ ಅಲೆಯುತ್ತಿರುವ
ನಿನ್ನ ನೆನೆದು-
ಒಂದು ಹನಿ ಕಣ್ಣೀರು,
ಮತ್ತೆಷ್ಟೋ ಹೆಮ್ಮೆ!
ಬದುಕಿನದ್ದೆಲ್ಲವೂ ನಿನ್ನದಾಗಿರುವಾಗ,
ನಾ ಬಯಸಿದ ಬಾಳನ್ನಿತ್ತ
ನಿನ್ನ ಕುರಿತು ಮೌನ ಕೃತಜ್ಞತೆ,
ಉಕ್ಕಿ ಹರಿಯುವ ಪ್ರೀತಿ...
ಅದಕ್ಕೇ ತಾನೇ? ಮೊನ್ನೆ ಯಾರೋ
ಸತ್ಯ, ಪ್ರೀತಿ, ಪ್ರಾಮಾಣಿಕತೆ ಎಂದಾಗ,
ಗಾಂಧಿಯೋ, ಹರಿಶ್ಚಂದ್ರನೋ ನೆನಪಿಗೆ ಬರಲಿಲ್ಲ!
ಬಂದಿದ್ದು ನೀನು, ನನ್ನಪ್ಪ!
ಈ ನನ್ನ ಬಾಳಿನ ಆದರ್ಶಧಾರೆ...

ದಾರಿ

ಏನೋ ಹುಡುಕಲು ಹೊರಟೆ, ಏನೇನೋ ಕಂಡೆ!
ಭೀತನಾದೆ...
ಹಳೆಯ ನಾಟಕದ ಹೊಸತು ದೃಶ್ಯಗಳಲ್ಲಿ,
ನಟಿಸ ಬರದೆ, ಸಹಿಸಲೊಲದೇ,
ಭೀತನಾದೆ,
ನಿರ್ಭೀತ ನಾನು ನಾಶವಾದೆ!
ಕತ್ತಲೆಯ ಬಾಳಲ್ಲಿ,
ದಾರಿ ಕಾಣದೇ,
ನಿಷ್ಕರುಣ ದಿಕ್ಕುಗಳ ನ೦ಬಲಾರದೇ,
ಮೌನವಾದೆ, ಸ್ಥಬ್ಧವಾಗಿ ಹೋದೆ...

ಪ್ರೀತಿಸಿದ್ದೆಲ್ಲವ ನಂಬಿ,
ಪ್ರೀತಿ ನಂಬಿಕೆಗಳ ಅಂತರವನರಿಯದ
ಭ್ರಾಂತ..!
ಯಾವ ದಿಕ್ಕಿಗೆ ದಾರಿ?
ಯಾವ ಕಡೆ ಬೆಳಕು?!
ಬಗೆಹರಿಯದ ಗೋಜಲಲ್ಲಿ...,
ಸುಸ್ತಾಗಿ ಆಗಸದತ್ತ ನೋಡಿದೆ
ಮನಸು ಹಗುರಾಯಿತು...,
ಇಷ್ಟು ದಿನ ಹೊಳೆಯದ
ಸತ್ಯ ಕಣ್ಣೆದುರಿತ್ತು..,

ದಾರಿ ಮೇಲ್ಮುಖವಾಗಿತ್ತು!
ಬೆಪ್ಪ ನಾನು! ಕೆಳಗೆ ಹುಡುಕೆತಲಿದ್ದೆ!

- ನಾನು ;)