Pages

Saturday, February 25, 2017

ಅಮರತ್ವ


ನಸುಹೊತ್ತು
ನಡೆಯುತ್ತ ಹೊರಟಾಗ
ನೋಡಿದೆ
ಪ್ರೀತಿಸುತ್ತಿದ್ದವು
ನಾಯಿಗಳೆರಡು
ರಸ್ತೆಮಧ್ಯದಲ್ಲೇ ಸ್ವಚ್ಛಂದ

ಪ್ರಾಣಿ ಮಾತ್ರ

ನಡೆಸಬಲ್ಲವು ಹೀಗೆ
ರಸ್ತೆಯ ನಡುಮಧ್ಯ

‍ಸಿಕ್ಕಿದ್ದೆಲ್ಲ ಹೆಕ್ಕುವ,
ಅಂಡಲೆಯುವ
ಎಲುಬು ತಿಂದು
ಇಂದಲ್ಲ ನಾಳೆ
ಎಲುಬಾಗುವಂತಹವುಗಳ
ಮೀರಿ ಅಮರರಾಗಬೇಕಂದರೆ

ರಸ್ತೆಯಲ್ಲಿ ಪ್ರೇಮವನ್ನು
ನಿಷೇಧಿಸುವ ಶಾಸನಗಳನ್ನು ಬರೆಯಬೇಕು.

Tuesday, May 24, 2016

ಬುದ್ಧನ ನಗು

ಆಸೆಗಳ ತೊರೆದ ಬುದ್ಧ ದಪ್ಪಗಿದ್ದ

ಸಾವು, ಮುಪ್ಪು,
ಬದುಕಿನ ವಿಷಾದಗಳನ್ನು
ಕಂಡಿದ್ದ ಬುದ್ಧ-
ಇವನು ಅವನೇ

ಮನೆಗಳಲ್ಲಿ ನೆಲೆಯಾಗದೇ
ಅಲೆಯುತ್ತಿದ್ದವ,
ಒಂದಗಲದ ಬಟ್ಟೆಯನ್ನು ಹೇಗೋ ಸುತ್ತಿಕೊಂಡು
ಸೋಜಿಗವಾಗಿದ್ದವ
ನಗುವಿನಿಂದಲೇ ನಿರ್ವಾಣ ತಲುಪಿದ್ದನೆಂದು
ಊರಿನಲ್ಲಿ ಸುದ್ದಿಯಾದಾಗ ಯಾರೂ ನಂಬಿರಲಿಲ್ಲ

ಶಿಷ್ಯರಿರದ, ಭೋದಿಸಿರದ ಬುದ್ಧ
ಹಾರಿಹೋಗುವ ತರಗೆಲೆಗಳಲ್ಲಿ,
ಸಂಪಿಗೆ ಹೂವುಗಳಲ್ಲಿ,
ಊರೂರಿಗೆ ನಗುವನ್ನು ಪಸರಿಸಿದ್ದನೆಂದರೆ
ಇತಿಹಾಸವನ್ನೋದಿದ ನೀವು
ಒಪ್ಪಲಾರಿರಿ - ತರಗೆಲೆಗಳ
ತುಂಬೆ ನೊಣಗಳ
ಸದ್ದು ಕೇಳದಂತೆ ಕಿವುಡಾಗಿ.

ಬುದ್ಧನನ್ನು ಕಾಣಲು
ಧ್ಯಾನಿಸುವುದಲ್ಲ

ಮನಸ್ಸನ್ನು ಮರೆಯಬೇಕಿಲ್ಲ
ಸುಮ್ಮನೆ ಟೀವಿ ಆರಿಸಿ
ಫೋನ್ ಮುಚ್ಚಿಟ್ಟು
ಆರಾಮದಲ್ಲಿ ಕುಳಿತು ಆಲಿಸಿದರೆ ಸಾಕು

ಡೊಳ್ಳುಹೊಟ್ಟೆಯ ಬುದ್ಧ
ಪ್ರತ್ಯಕ್ಷನಾಗದಿದ್ದರೂ
ಪ್ರಕೃತಿಯ ಗುಂಯ್‍ಗುಡುವಿಕೆಯಲ್ಲಿ
ಬುದ್ಧನ ನಗು ಪಸರಿಸುತ್ತಿರುವುದನ್ನು-
ನೀವೇ ಕಾಣಬಹುದು


Monday, May 16, 2016

ಕ್ಲೀಷೆ

ನಮ್ಮ ಬಗ್ಗೆ ಬರೆಯುತ್ತ ಹೋದರೆ
ಕ್ಲೀಷೆಯಾಗಿಬಿಡುತ್ತದೆ:
ಎಲ್ಲವನ್ನೂ ನೋಡಿ,
ಎಲ್ಲ ಓದಿದವರಿದ್ದಾರೆ

ನಿನ್ನ ಮೌನ, ನಮ್ಮ ಮಾತು
ಒಬ್ಬರನ್ನೊಬ್ಬರು ನೆನೆದು ಹಿಗ್ಗುವುದೆಲ್ಲ
ಬರೆದು ಓದಲು ತಕ್ಕದ್ದಲ್ಲ-
ಎನ್ನುವಾಗ,

ನಾವು ಹಳೆಯ ಇಂಗ್ಲಿಷ್
ಕ್ಲಾಸಿಕ್ಕೊಂದನ್ನು ಹಿಡಿದು,
ಓದುವ, ವಿಮರ್ಶಿಸುವ,
ಒಬ್ಬರಿಗೊಬ್ಬರು ವಿವರಿಸುವ
ತಮಾಷೆ ನಡೆಸಬಹುದು