ನೀರ ಹೀರುತ್ತ ಕುಳಿತ್ತಿದ್ದೇನೆ

ಕೂತ ಕುರ್ಚಿಯ ಕೆಳಗಿನ

ಮಹಡಿಗಳ ಕಟ್ಟಡದಲ್ಲಿ

ನೀರ ಹೀರಿ ಹರಿಸುತ್ತಿರುವ ಕಾಂಡಗಳು,

ಬೇರುಗಳುದ್ದದ್ದ ಚಾಚಿ

ರಾಜ್ಯರಾಜ್ಯಗಳಿಗೆ ಹೋಗಿ ದಾಖಲೆಗಳನ್ನು ಕೇಳುತ್ತಿವೆ

ಡ್ರೋನುಗಳ ಮುಂದೋಡಿ ತಬ್ಬಿಬ್ಬಾದವರ

ಎದೆಬಡಿತಗಳೊಡನೆ ಕುಣಿದು,

ಹಲ್ಲೆಯಾಗಿ ಮನಸ್ಸೆಲ್ಲ ಮಬ್ಬಾದವರ

ಬಿಸಿಯುಸಿರಿನಲ್ಲಿ ಕುದಿದು,

ಮಕ್ಕಳನ್ನೇ ಮಂಕಾಗಿಸಿದ

ವಾಯುಗುಣದಲ್ಲಿ ತಣಿದು,

ಕಾದಾರಿ ಬಂದಿದೆ

ಪಿತ್ರಾರ್ಜಿತವಾಗಿ ಬಂದಿದೆ

ಕೆಲವರನ್ನು ನಾಲ್ಕಾಗಿಸಿ

ಹಲವರನ್ನು ಹೊಸೆದು

ತಾತಂದಿರ ತಾತಂದಿರು ಬರೆದು

ತಿಳಿದವರು, ನೆರೆಯವರು, ರಕ್ತದವರು

ಕಣ್ಮುಚ್ಚಿ ಕುಡಿದ

ನೀರಿನದ್ದೇ ಒಂದು ಪಾಲು

ಹೀರುತ್ತ ಕುಳಿತಿದ್ದೇನೆ

ನೀರಿನಲ್ಲಿಯ ಮುಖಗಳನ್ನು

ನೋಡದಿರುವಂತೆ

ಕುರ್ಚಿ ಸರಿಸಿಕೊಳ್ಳುತ್ತ

- ಸುಬ್ರಹ್ಮಣ್ಯ ಹೆಗಡೆ